Mat 17 | ZomZIV | STEP | Niguk khit ciangin Jesu in Peter, James le James sanggampa John-te zawnin mualsang tungah a kahtohpih hi.

Matthew 17

Mel kilamdanna

1 Niguk khit ciangin Jesu in Peter, James le James sanggampa John-te zawnin mualsang tungah a kahtohpih hi. 2 Tua lai-ah amaute mitmuhin a pum piandan a kikhel hi. Amai ni bangin tanga, a puante khuavak bangin a leng hi. 3 Tua khit phetin amaute mai-ah Moses le Elijah kilang a, Jesu tawh a kiho uh hi.

4 Peter in Jesu kiangah, “Topa, hih lai-ah i om nuam mahmah hi. Nong awi leh, buk thum—nang ading khat, Moses ading khat, Elijah ading khat, hong lamsak ning,” a ci hi.

5 Tua banga a pau laitakin meiingo khat in amaute tuama, tua meii lak panin, “Hih in, ka it ka Tapa ahi hi, ama tungah ka lung a kim mahmah hi; ama thu na ngai ta un!” ci-in aw khat a ging hi. ^a

6 Nungzuite in hih awging a zak uh ciangin lau uh a, lei ah a khupbawh uh hi. 7 Ahi hangin Jesu pai-in amaute lawnga, “Tho un, lau kei un,” a ci hi. 8 Amaute a khuadak uh leh Jesu longal kuamah a mu kei uh hi.

9 Amaute mualtung pan a paisuk kawmkawmun Jesu in amaute kiangah, “Mihing Tapa misi pan a thawh mateng, na muhsate uh kuama kiangah gen peuhmah kei un,” a ci hi. ^b

10 Nungzuite in, “Tua ahileh thukham siate in, ‘Elijah hong pai masa pelmawh ding hi,’ ci-in bang hangin hilh uh ahi hiam?” ci-in a dong uh hi. ^c

11 Jesu in dawnga, “A taktakin, Elijah hong pai-a na khempeuh a bawlpha ding hi. 12 Ahi hangin ken kong geninah, Elijah hong pai khin zo napi amaute in amah a thei kei uh hi. Ama tungah amau ut bangin a bawl uh hi. Tua mah bangin Mihing Tapa in amaute khutlum a thuak ding hi,” a ci hi. 13 Tua ciangin Jesu in Baptize-pa John tawh kisai-in a gen ahilam nungzuite in a theitel pan uh hi. ^d

Dawilut Naupang khat Damsakna

14 Mihonpite lakah amaute a pai laitakun mi khat in Jesu va naih a, a mai ah a khukdin hi. 15 Amah in, “Topa aw, ka tapa lainat in. Amah sibupbupin, gim mahmah hi. Mei sung khawng tui sung khawngah puk zelzel hi. 16 Na nungzuite kiangah ka paipih hangin a damsak thei kei uh hi.” a ci hi.

17 Jesu in, “Thu um lo-a a lehtat khang mite aw, note tawh bang tan vei om khawmin bang tan vei hong dawhdawh zo ding ka hi hiam? Tua naupang ka kiangah hong paipih un,” a ci hi. 18 Jesu in tua dawi a tai ciangin naupang sung panin paikhia-a, tua hun lianin naupang a damsiang pah hi. ^e

19 Tua ciangin Jesu kiangah nungzuite va paituam uh a, “Bang hanga ko hawlkhia thei lo ka hi uh hiam?” ci-in a dong uh hi.

20 Amah in, “Na upna uh a neu luat hang ahi hi. Thutak kong geninah, upna ankam tang cia-a neu khat na neih uh leh hih mualpi kiangah, ‘Hih mun pan hua lai-ah kisuankhia in,’ ci le uh cin kisuankhia ding hi. No adingin a hi thei lo bangmah a om kei ding hi. 21 Ahi hangin thungetna le antanna longal in hih bangte a hisak thei kei hi,” ^{▼▼17.21 Khutgelh pawlkhatah tg.21 na om lo hi} a ci hi. ^g

22 Amaute Galilee a tunkuan uh ciangin amaute kiangah, “Mite khutah Mihing Tapa kilehhek ding hi. 23 Amaute in amah that ding uh a, a ni thum ni ciangin kihingkiksak ding hi,” a ci hi. Tua ciangin nungzuite a dah lua mahmah uh hi. ^h

Biakinnpi Siah Liauna

24 Jesu le a nungzuite Capernaum a tun khit uh ciangin siah drachma nih dongte Peter kiangah va pai uh a, “Na siapa un biakinnpi siah pia lo hiam?” ^{▼▼17.24 Greek ah tua drachmas nihte sumtang pek nih} ci-in a dong uh hi. ^j

25 Amah in, “Pia mah hi,” a ci hi.

Inn sungah Peter a lut ciangin Jesu in na hopih masa a, “Simon aw, nang bang na ci ngaihsut hiam? Leitung kumpite in mangmu le siah kua tungah dong uh ahi hiam? Amau tate tung hiam? Midangte tung ahi hiam?” ci-in a dong hi.

26 Peter in, “Midangte tungah a dong hi,” ci-in a dawng hi.

Jesu in, “Tua bang ahileh tate a peng hi. 27 Ahi hangin amaute i lungkimsak nadingin tuilipi ah va pai inla, ngathang va siah in. Na mat masakpen a kam phen lecin drachma tang li man sumtang khat na mu ding hi. Hong tawi inla, kei le nang siah dingin amaute pia in,” a ci hi. ^k